الـزكـرتيه - عرض مشاركة واحدة

**Buffy** · 05-14-2007, 07:49 PM

الصلاام علااكم ..

مرحبـــن ألــف ..
مرحبـــا هيل عد السيـــل ..
مرحبـــا تراحيب المطر..
يا بعد حـيي..
مرحبن بوه ..
يالله حيهم ..
نزلتم أهلاً و وطئتم سهلاً..
لك ياميت أهلا وسهلا ..
هـلا و غـلا ..

..نـــعم..

تبون شي ..

ايه صح أنا اللي منزله الموضووع .. سووري

نبدأ مع:مناسبة الموضوع:

بما أن الجميع مدهر بغرفة السواق هاليومين قررنا أنا بافي و أموله المهبوله وماروكو
في أحدى جلسات الأنس اننا ندهر مع المدهرين حنا موب اقل منهم<<< انطمي بس

بأختصار ناوين نفجر لكم بغرفة السواق ثلاث قنابل الله يعينكم بس

*ألية الموضوع:
فكرنا اننا نسوي موضوع جماعي يعني نتقاط كل ابونا فيه من باب التعليم التعاوني اللي طايحين به هاليومين بالمدارس

وقررنا ان الموضوع بيكون ثلاث حلقات أو ثلاث أجزاء كل وحده تمسك حلقه وتسوي بها اللي تبيه

طبعا ذي فكرتي .. من زين الفكره ..

الحلقه الأولى -القنبله الأولى-

عندي سوالف كثيره ماهنا اكثر منها يعني لو خليتوني احكي من الحين الين بكره ماقضيت
على قولت امي بالعه مسجل و أصلي بعد مايخرب <<< اذكروا الله لايصيرلي شي واقلب طرما عاد ذيك الساعه تبتلش فيني امي

ولاأعرس عاد مو مصبرها علي الا انه بيجي يوم واعرس قايله لكم عقدتي العرس<<< بيش وش صار عالفريق الأول

نرجع حق محور حديثنا
ببدأ سوالفي معكم منذ الطفوله حيث كانت طفولتي مليئه بالمواقف والحوادث الغريبه والمضحكه ركزوا عالحوادث

أول حادث حدث يوم كان عمري 4 سنوات
كنت نايمه بغرفتي و ملامح البراءه تشع من خشتي الجميله
حيث كنت نسخه من هايدي بالذات الخدود الحمر
بس ماعندنا جبال الألب اللي عندها عندنا كثبان الثمامه <<<

جت الساعه تسع وقررت الاميره النائمه الاستيقاظ
والله وأقوم و أوقف قدام التسريحه واقعد اتأمل صنع الخالق سبحان الله هههههه
وش هالجمال وش هالزين كلي ملح وقبله فديت هالخشه اموواه

<<< وحده تحب عمرها عندكم شي

بعد التأمل قررت اني اطلع من غرفتي

جيت بفتح الباب ماطاع يفتح
ياناس ياهوو يمين يسار مافي فايده مع العلم أني كنت نحيله أي عصلا حتى الآن
طبعا الباب ليش ماطاع ينفتح
لأنه كان في هوا قوي يدخل من الدريشه

Of course
أنواع الصياح و الصراخ

But
"لقد أسمعت اذا ناديت حي
ولكــــن لاحياة لمن تنادي"

في تلك الاثناء لفتت انتباهي الستاره حينما تداعبها نسمات الهواء الرقيقه
قربت لم الدريشه وصرت أناظر
و جاني ابليس صغينون لونه أحمر و عنده قرون ومعه شوكه طويله

وقال :ليش يابنت ماتتسلقين الشجره وتنزلين تحت زي ماوكلي <<< ووه فديته-فديت ماوكلي موب ابليس-

طبعا اعجبتني الفكره
لفيت على ابليس الصغينون وقلت: طيب بس ابي فزعتك
قال :ابشري كم عندنا بافي
قلت بدلع :وحده

طب وحده وحده وبلاش كل دا يجي مره وحده اتجنن كذا <<< خشت جوو

بدأت بالتنفيذ
مسكت غصن من الشجره ومن زود الذكاا والنباهه عندي الغصن كان صغيرون وسخيف

وش تتوقعون حصل

طرررررااااااااخ

طحت بالحوش
اشوا موب فالشارع والا كان خقوا معي كل من في الشارع <<<ترا ماأقصد الهنود والبنقالين

صح نسيت أقولكم غرفتي بالدور الثاني <<<تشرفنا

متصورين وش اللي حصل

على صوت الطيحه جاتني امي والشغاله مذهولين مني <<<قايلتلكم خارقه ذي البنت بس محد مقدرني
جو بيشيلوني من الأرض وأنا أقول بنفسي يحسبوني مت وبيرموني بالزباله
واقعد اصيح واقول
ماما.. ماما.. انا مامت سوفيني انا دويه -قويه-

وامي تصيح وتقول البنت بتروح من بين يديني
وانا اطير عيوني واتلفت وشو وين أروح..!!..

<<< من يومي فاهيه ياملحي

في المستشفى

فريق كامل من الاطباء والممرضين على راسي بيشوفون انواع الكسور والاعاقات اللي جاتني وكل شوي اشعه وخرابيط
وأنا فاغره خشتي ابيهم يقضون برجع بيتناا

بس اللي لف روسهم جميعا انه
ماجاني اي كسر او شي

الجميع مو مصدقين شلون طبت من الدور الثاني وكنها جنيه ماصار لها شي<<<مثل الأوط=القط بسبعة ارواح

على فكره هالشي حصل لي بجد بجد وماأكذب والله العظيم<<<خلاص صدقوك

سنعود بعد قليل:

اللي طفش يروح ينط ثلاث طعش نطه على السرير وياكل تويكس ويرجع عشان اكمل
بجدالطفش بيروح منه تراها طريقه مجربه من حضرتنا
واللي مايبي بكيفه يستاهل خله يطفش و بيكمل الموضوع غصب .. هوا دخول الحمام زي خروجه >>ازيك ياأبله عطيات

عدنا:
أعتقد ان الجميع تجيه حالات تناحه و فهاوه

طبعا انا وبلا فخر اكبر فاهيه على وجه الارض
وأكبر دليل على هالشي المواقف اللي تصير لي

من اكثر المواقف اللي تصير لي لخبطة الحروف في بعض الكلمات
فهمتوا
.
.
.
اكيد لا<<< تحسبهم زيهاا

أقصد اني أبدل حروف الكلمه وأغير مكانها

بعطيكم امثله عشان تفهمون

=هذا الموقف اللي بقوله لكم حصلي بعد يوم عمري 4سنين.. يعني بعد ماطبيت من الدريشه ..
كان الدكتور معطيني مراهم و كريمات عشان الرضوض اللي جاتني ..
و كان المرهم اللي كاتبه لي الدكتور مرسوم عليه صورة ولد حاط ايده على ظهره

بصراحه دورت على هالمرهم بجيب لكم صورته بس مالقيت الا واحد يشبهه .. وهذي صورته ..

وكنت أسمي هالمرهم بإسم غريب عجيب و عجيب غريب.. بزر ماعلي شرهه يعني لحد يعلّق علي ..

كنت أسميه" ابراهيم يحك مكيوته "
وضح الأسم والا اشرح لكم >> من وساعت الوجه بتشرح

ابراهيم= مرهم

>>>>خبله صوووح

=مره كنت تعبانه ورحت المستشفى مع ابوي
بعدين قالي: وش قالت الدكتوره ..
قلت له:تقول معك اقتحام في الحلق..

ابوي طير عيونه وشو اقتحام من اللي اقتحم حلقك هـااه..!!

بعدين بعد ماشرحت له اكتشف اني اقصد اقتحان أقصد احتقان بالحلق ههههههههههههههه

=مره ايام الابتدائي كنت بطلع بالاذاعه وكنت انا اللي بقول المقدمه
وازعجت اهلي بالبيت فرحانه و كل شوي اقراها لهم المقدمه اللي هي كالتالي
مديرتي الفاضله..
معلماتي العزيزات..
اخواتي الطالبات..

السلام عليكم ورحمة الله وبركاته <<<<<مدري متى ناوين يغيرون هالمقدمات التحفه

غطست في اعماق البحر العميق ابحث عن الدرر الثمينه
فوجدت 5 صدفات الصدفه الاولى وجدت بها تلاوه من القران الكريم والطالبه فلانه فلان الفلاني
ومن هذا المنوال
بس يوم كنت اقراها عند هلي وانا مجمعتهم كلهم ماكنت اقول صدفات كنت اقول

فقصات

والى وقتكم الحالي ابوي يناديني فقصه خخخخخ
عاد ياويلكم لو تعايروني

=مره أيام ثالث ثانوي .. كان عندنا حصة حديث و كانت الحصه السادسه و اللي بعدها السابعه عندنا رياضيات..
يعني لكم أن تتخيلوا النفسيه كيف .. زفتوون ..

كان درسنا عن الصفات الواجب توفرها براوي الحديث ..
من ضمن هذي الصفات أنه عدول .. و مدري ايش .. و الأهم أنه يكون صدوق..

طبعاً كانت الأستاذه تشرح شرق وأنا غرب .. يوم شافتني كذاا ..
جات فوق راسي .. وقالت: باااافي

أنا: هلااا .. هاااه .. نعــم

و وقفت ..
قالت: وش الصفات الواجب توفرها بالراوي..؟؟
أنا بنفسي: يا لليل التبن .. الحين كيف أجاوب وأنا منيب لمهاااا ,, والله بتخسفني بالدرجاات <<< أكبر همهاا

سمعت صوت خويتي و هي تقول صدوق صدوق ..بصوت واطي ..
وأنا كما هو معهود عني لقطتها وهي طايره وقلت بصوت عااالي : صنـــدوق ..!!

الأستااااااااااذه .. فطست ضحــك ..
والبنــــات ..مايقصــــرون طبعـــاً..

أنا مو فاهمه وش السالفه قالت لي خويتي صندوق وقلت صندوق وش صار يعني ..!!

قالت خويتي: يالمهبوله .. أنا اقول صدوق يعني يصدق موب صندوق ..
فهمت وش سويت وقلت لازم أضبط شكلي قدامهم مابي أحد يضحك علي ..
قلت: أستاذه أنا قلت شي غلط ليش تضحكون <<< مسويه فيهاا
قالت: طيب .. شلون يعني صندوق..
قلت: يعني يكون زي الصندوق .. يحفظ الحديث ومايطلعه لأي أحد ..
طبعاً وأنا أتكلم أحرك ايديني وأمثل شكل الصندوق<<<<عشان يفهمون

قالت الأستاذه : الله يخلف عليك بس .. اجلسي ..

يا ربيـــــــــــــــــيه .. مدري وش أبي

=هذا موقف موب لي بس وحده قالت لي عليه بجد تحفه ..
تقول أنه كان عندهم في الفصل أيام المتوسط بنت سوريه ..
وماتفهم اللهجه النجديه اللي تتميز بأنها تنتهي بحرفي( التاء والسين )و بعض الناس
بس يقولون (السين) مثال ,, كيفك= كيفس ..

المهووم .. أن أستاذتهم دخلت عليهم .. و قعدت تصارخ عالبنات تبيهم يهدون ويجلسون أماكنهم ..
أول وحده صرخت عليها هالبنت السوريه وقالت لها وين مكانس ..!! يعني مكانك..
قالت البنت ببراءه : أستازا في مكنسه ورا الباب..
هههههههههههههههه

تصدقون عندي مواقف أكثر بكثير .. بس أغلبهاا مشفره فشله أنزلهاا هنياا

خلنا نترك المواقف على جنب.. وقبل لاأودعكم ..

وبوريكم شي .. ماقد شفتوا مثله أبد أبد ..

مستعديــــن..

عن جد .. يلا go

بوريكم جوجو ..

حبيب ألبي .. جوجو دلع جموول ..

وش رايكم بالله مو يهبل هههههههه طبعاً هالصوره بعد ماكشخته لكم

و هالشي اللي فوق اللي هو جوجو معروض للبيع .. اللي يدفع أكثر ياخذه .. تراي أتكلم جد الجد ..

أقولكم ليه ببيعه ..

الصدق زين ..

أحس عيونه تخووف ..

نظراته شريره ..

تدرون أني بالليل أصك عليه الدولاب <<< خواااااااااافه

وصورته لكم بالنظارات الشمسيه عشان ماترتاعون منه..

وبغيت أصور لكم ميشوو.. بس للأسف موب معروض للبيع .. ماأقدر أستغني عنه ..
ميشوو<< خرووف بس مرره كيووت و سو نايس ..
بس بموضوعي الجديد أوريكم صورته <<< ترا ذا مو وعد أنه بوه موضوع جديد

ولحد يقول لي فاتحه حديقة حيوانات بغرفتك ..

غرفتي وأنا حرره

يلا حبايب ألبي .. موضوعي قضى .. و متأكده أنكم طفشتوا .. بس محد قالكم أقروه <<< ماتنعطى وجه

الله الله بالردود السنعه التي تثلج مدري تفلج الصدر هههههههه

يلا طحياااااااااااتي..

ويذ موضوع أموله وماروكو <<<< ماتحتك أبد