الـزكـرتيه - عرض مشاركة واحدة

**بيـــــــــش** · 05-02-2007, 02:09 AM

مساء النور للجيمع

معليش عمو موزكرت

بابنا يشبه باب الملحق

نفس الزخرفة ونفس الوردات ونفس كل شي

الاختلاف الوحيد بين بابنا وبابهم هي مسكة الباب

هم حاطين وردة صناعية كواجهة ترحيبية وحنا نفتحه ونسكره بـ سيم

وكل مرافق بيتنا العزيز تورحّب باللافين الجُدد والقُدم

وهذي ترحيبة سواقية تفوح منها ريحة الهيل وينقط منها دبس التمر

فأهلاً بك واتمنى لك إقامة سعيدة ودائمة بين جدران بيتنا الغالي

اقتباس:

دراسه علميه جاده

حسيت اني المستشار وأنا أقرا العنوان

واسمك ماكلفت على نفسي أجمع حروفه وأقراه

لمحته وحسيت انه صعب قلت ماهوب لازم أكتب اسمه يوم أرد

بس شفته بالعربي في نهاية الموضوع وقلت زين سوّا

تقرب لك صديقتي مزكرته؟ >> على جح

واحساسي يقول ان الدراسة جات نتيجة تمقّل في مسمى القسم

غرفة السواق

يعني سيارات وشاحنات ودوّار وحوادث وشرطة وكنسلة فيَز وتسفير

ماهوب أنت لحالك كثير يسألوني عن معناه (وجه مشهور بالغصب)

يظنونه قسم خاص بتصليح السيارات ومعداتها واكسسواراتها

يعني ورشة نتية

ويستغربون ان وحده بنعومتي يحطونها ميكانيكي القسم >> على سكروب

وصارت حوسة وزحمة وتصريحات وحلفان ألين صدقوني انه قسم يهبل

اقتباس:

انواع قائدي المركبات في شوارعنا يعني بالمصطلح الحورجي ((الطاره))

يقال لك مترجمها؟ ،، ليتك خليتها على الأولى أزين

وليتها جت على هذي بس

الموضوع كله مصطلحات صعبة وأشياء سمعت بها ماشفتها

مثلا السيارات انا ماأعرف إلا الددسن الله لايحرمني من خضخضة مصراني فيها كل صبحية

والفورد أنا وبنات عمي غاسلينها بالهوز في إحدى الرحلات الاستراحية

والسوبربان يازين التربع في شنطتها بدلال القهوة وقراطيس الكاكاو منتثرة من حولك(وجه هافمون)

والهمر >> ولد مطرب فواز

بس ياراس ونترا واكورد ذي مابعد تعرفت عليها

بس يخلونا نسوق أبقعد أجمع صور السيارات وألزقها بجدار غرفتي

وكل يوم أتمشى في معرض سيارات حج وقضيان حاجة

اقتباس:

فاذا خربوها يعني في الاكسسوارات راح لزق صورة الورع ابوشوشه

ياليتهم كلهم يحطون صور

على الأقل نفهم وش يبون بالضبط

من فترة كنا في إشارة وكان قدامنا واحد لوحة سيارته متعلقة بإذنها وترقل

والسيارة أحس انها تمشي بدعوة أم

ويوم بغى يرقع حالها خربط وراها بالانجليزي

وبخطوط تهبل وألوان فسفورية والشين حاط ايميله بعد >> لو هي همر

ويوم تطوعت اختي وترجمت اللي مكتوب طلع كاتب:

(نعم الواقع مُر ولكن أن نصحو من الحلم أمرّ) حكيم

وبعضهم يحط أشياء أقص يدي اذا هو فاهمها

الظاهر تعويذات وطلاسم عن العين بس شكلها حلو (وجه كورنيش الخبر)

أنا اذا عطوني سيارة أبحط عليها صورة الملك عبودي ولينك المنتدى

وصورتي >> علشان ماأحد يتجرأ يكلمني

وأحس اني أبصير من فئة جر العربات

يقولون الهون أبرك مايكون ،، وشو له العجله

وأنا أحبذ السير جنب الشارع على الرمل وإلا أحوس داخل الأحياء ألين أوصل بيتنا

واذا انحديت أمر في شارع رئيسي قطعته مشي وخليتهم يسحبون لي سيارتي

وش لي بوجع القلب والمراقل في الشوارع الرئيسية

اقتباس:

اجل دوار حاطين فيه اشاره طيب ليش الكلفه ويصلحون دوار ويشجرون ويحطون من هالشتلات واخرتها اشاره والله عيب فشلونا

دوّار المخازن؟

>> يقول بالرياض ترى

ياحظكم يشجرون ويحطون شتلات على الأقل

حنا زرعوه يوم جا عندنا لبى قلبه الملك ويوم ثاني رجع التصحّر في الدوّار

و ياربي على ذيك الفترة صرنا نتمشى نحس اننا شوي وبنشوف البحر يتصافق على جال الرصيف

لمبات وصور وزينة ونظافة وشوارع تدّهر

والظاهر انهم شالوهم للزيارة الجاية

مع التحية لبلدية الأحساء وهنودها الكرام

اقتباس:

صح انا مواطن سعودي ولي الحق اني اطالب بحقي ولكن اذا كان فيه احد يسمعك بس في وضعنا الحالي انسى
حالك حال الناس ومنت باحسن منهم

أنت لو جيت للحسا تبي تحب يدك وجه وقفا على النعمة اللي أنت فيها

وهذا حنا راضين ونحب الحسا

ولو يعدلونها بنهج منها ،، تعودنا على دعثتها

وأنا عن نفسي بحاول أوصّل صوتك للمسؤولين

وبقول لهم ياخذون ميزانية شوارع الحسا ويحطونها بشوارعكم

ويعتبرونها سلف ألين ربي يفرجها ويردونها

ماحنا مستعجلين مع انهم يقولون قريب بيسوون كبري بس من هنا لذاك اليوم يجيب الله مطر

وسعوا عليكم انتوا أكثر منا (وجه سطحي)

عمو مزكرت

موضوع حلو مع اني ساحبه على ثلاثين أرباعه مافهمته

بس اسلوبك حلو وعفوي

وهذا أحلى شي يميز مواضيع المنتدى ككل والسواق كـ بلحاله

أتمنى انك تستمر في الكتابة معنا وماتحرمناش من قديدك

ختاماً عمو مزكرت هل تقرب لك مزكرته؟ >> انطمي

ويذ الـ ه >> يعني لاهي بدليه ولا خطأ مطبعي ولا فاصله وش هي