بسم الله الرحمن الرحيم

مساء الخير للجيمع ...... اسعدتم مساءً..... الله يمسيكم بالخير ......مساءالورد ...... اقول اخلص علينا ترى طولتها ه

طيب ... طيب ولا تزعل اول شي رحبوا فيني كعضو جديد جايب لكم موضوع يفطسكم من الضحك الموضوع اليوم وهو دراسه قمت بها بنفسي وايضا بمساعدتي انا ايضا وهي انواع قائدي المركبات في شوارعنا يعني بالمصطلح الحورجي ((الطاره)) فوجدت ان هناك انواع مختلفه منهم دعني احددهم على شكل نقاط ثم نفصلهم واحد تلو الاخر : ه
سائق الفورملا ون
وسائق الراليات
وسائق الدراجات الناريه
وعشاق جر العربات

نبدء باول نوع وهو سائق الفورملا ون وهذا تحصل سيارته كامري او هواندا اكورد او لومينا او مكسيما طبعا انوار زنون +وتغييمه من زيبارت +لحس كفرات +تنزيل مقعد السائق لين يدق في المرتبه الخلفيه علشان اذا ريوس يشوف اللي وراه +انوار السقف الداخليه اللون على حسب مزاج السائق اذا كان الاخ يحب اللون بيكون احمر واذا كان الاخ راعي هجوله اللون يكون ازرق اما اذا كان مخربها راعي حشـ..... راح تحصل اللون اسود +كاب احمر او ازرق فاتح نيلي , ودائما تحصله ماسك يسار الخط وداق النور العالي وانواع التكبيس جكح جكح وصوت المسجل اللهم يا كافي يا ماكسول هاوس ه
بعدين هذا النوع له ميزه عجيبه غريبه وهي انك اذا جيت تبي تطوف وهو وراك لا تدق اشاره لانك اذا دقيت اشاره يحس انك اهنته فلا يدع لك مجال علشان تطوفه.ه

اما النوع الثاني فهو سائق الراليات وهؤلاء تحصل سياراتهم جيب او جمس او ددسن او كابرس بوكس ضروري بوكس طبعاً الكفرات خط والبوري طط+تسحيب سست+دعامات اماميه+جاعد للمراتب هؤلاء ابعد عنهم والله يرقاك مثل السلام عليكم يعني تشوفه يمين رح يسار تشوفه يسار رح يمين يعني انحش اي اسكب او رن بفتح الراء وتسكين النون
وهؤلاء ايضا لديهم ميزه وهي انه اذا قدر الله عليك طحت في زحمة خريص وفاتك المخرج اطلع الرصيف ماعندك مشكله

اما النوع الثالث سائقي الدراجات الناريه فهؤلاء سياراتهم اكسنت او صني او النترا او ياراس طبعا لاتعليق فاذا خربوها يعني في الاكسسوارات راح لزق صورة الورع ابوشوشه هذاك والله ماني عارف وش قصته المهم ماعلينا هذولا مع ان السياره قوطي الا انواع التهور كانه راكب بانشي ويقحص في طعوس الثمامه الى درجة انه مره واحد راعي اكسنت يبي يعدي الى المسار الايسر الى الايمن وراعي تريله جاي في المسار اللي في النص وقدامه سياره وراه سياره يعني الاكسنت ماله امل يعدي الاخ دخل من تحت التريله وعدى للمسار الايمن يعني شي مو معقول هذه السالفه حقيقيه يعني مايحتاج احلف الله يهديهم


اما النوع الثالث جر العربات فهؤلاء ليس لهم سيارات معينه يعني يمكن يكون اي نوع من السيارات ولكن الفرق هو في نوع السائق وهم نوعان : ه

الشيبان
ابو هنود
المصري


نبدء في الشيبان يجيك الواحد داق لطمه وكانه شام ريحه مهي زينه وماسك المسار اللي في النص ويمشي 40كليو متر في الساعه يعني مشكلة خريص من هؤلاء العينات والله لا بوري ينفع ولا تكبيس الى اذا تبي ترقاه يعني تورشعه اللمهم انا اقترح على المرور انهم يحددوا سن معين بعده يسحبون الرخصه وانا افضل سن الخمسه والاربعين لانه خلاص بعده يا يجيب سواق او خلاص يبطل هجوله


اما النوع الثاني فهو ابو هنود تحصله ملزق المرتبه للدركسون حاط انواع الدهونات على شعره تشم الريحه على بعد مخرجين من سيارته بعدين اذا ابو الشباب قرر يلف او ياخذ مخرج يدق اشاره وهذي حاجه زينه لكن والله لو يكون جنبه قلاب تريله شيول اي مصيبه لاف يعني رايح يلف ماعنده مشكله لو يتوطونه خلاص ماهو داق اشاره ابو الشباب يصير الشارع شارع ابوه

اما المصري وهو النوع الثالث يخرب بيته كانه رايح يحارب او مايركب يتشهد ويصلي ركعتين بعدين المصري خريش والله لو واحد يدق بوري في شارع الملك فهد وهو ماشي في طريق الملك عبدالله طلع الرصيف تحصله متحضن الدريكسون المكيف على اعلى شي والعرق شلال يخرب بيته تشوفه تقول وش هالسفاح لكن ما فيه قلب حنين ربي يخليه لامه

يعني حاولت اني اطلع بقدر اكبر من الفائد في هذه الدراسه ولكن للاسف الحال يرتى لها مع شوارعنا في الرياض اجل دوار حاطين فيه اشاره طيب ليش الكلفه ويصلحون دوار ويشجرون ويحطون من هالشتلات واخرتها اشاره والله عيب فشلونا مع الرصيف اللي صابغينه نصه اصفر بأسود والنصف الثاني ابيض بأسود الله لايعمينا الظاهر هالمواصلات معيينين واحد عنده عمى الوان والا شارع طول عرض واخرتها يوترن يخرب بيت الشغله هذا ماعنده عمى الوان هذا عنده حول الله يستر بكره تمشي مع شارع وتوصل لنهايته وتحصله مقفل وفيه لوحه مكتوب فيها وش جابك هنا يالله ارجع
والا انواع الحفر وكان تونا طالعين من الحرب العالميه يخرب بيتهم والله لو شغلوا مدفعية الحرس الوطني علينا شهر ماكان صارت شوارعنا كذا لا حول ولا قوة الا بالله المهم انا تعبت نفسي و صلحت هالدراسه وبالاخير قطعتها لاني وبصراحه نقدت على نفسي مهبول انا وش دخلني صح انا مواطن سعودي ولي الحق اني اطالب بحقي ولكن اذا كان فيه احد يسمعك بس في وضعنا الحالي انسى
حالك حال الناس ومنت باحسن منهم
معليش ازعجتكم بهالدراسه الفاشله ولكن اتوقع ان فيه ناس زيي متضايقين من هالشي مثلي

صديقكم الجديد القديم مزكرت