ياصاحبي كلي أشيا مالها ثاني=ياكود باقي شقاي .. وحلمي الوردي
لاينكسر خاطرك من قّل خلاّني=انا لو إنّي عدد .. بطلع عدد فردي

على طريق الغرام اخر محطاتي=نهاية ٍ رجعتني للبداياتي
لو ما امتلا العمر من غيمة بشايرها=لاكان عمري فراغات فراغاتي
ماجت تقول الهوى ربٍ فنعبده=ولا رسولٍ عليه افضل صلاواتي
جت تلغي اسوا مفاهيمي وتعكسها=على اتجاهات غير الاتجاهاتي
تاخذ من اجمل مراحلها وتعطيني=مايجعل احلامي برهن اختياراتي
تقولي خلك مخلد على الحاضر=بلغي لك الماضي وبضمن لك الأتي
ابقا على تسعه وعشرين من عمرك=وباقي السنوات ضفها مع سنواتي
الحب ماهوب طيرا في سما ربه=يرحل متى يرحل وياتي متى ياتي
الحب سلطان في ظلمه وفي عدله=يجبرني اقول رغما عن قناعاتي
لك الولايه ورث القلب والبيعه=الملك لله ثم إليك مولاتي
يافتنةٍ من اناء الحسن مصبوبه=على الجمال الطبيعي بالمقاساتي
قبلك وكل القلوب الخضر منساقه=ورا النسا والمفاتن والشهواتي
ومن يوم حولتي انظار البشر يمك=عيت تلد المشالح في العباياتي
لايمكن الوقت ياخذني ويسرقني=عن لحظةٍ ذوبت ذاتك على ذاتي
كن السحابه وانا عيني على جيدك=تشكلت فوق راسي من تنهاتي
حديقةٍ بين نهر ونهر مزروعه=مكتظةٍ بالفراش وبالنباتاتي
فستانك الازرق يحرر تفاصيلك=وانا اتهجاه واخونك بنظراتي
لو لم يكون اجمل الالوان ازرقها=ما اختاره الله لون للسماواتي
ولو ماوقف خصرك الناحل ورا شعري=ماعلقت في القباب الخضر راياتي
حبيبتي لا لمحتي الانس يغمرني=لاينخدع قلبك بزيف إبتساماتي
لو يولد الحزن من صدرٍ بلا ضيقه=مايولد الضحك من رحم المعاناتي
جيتك وانا ذكرياتي كنها الاسماء=يشيلها الحي لو انها للامواتي
ماجيت اراجع علاقاتي من اولها=جيتك على شان اكفر عن علاقاتي

لايغرّك حجب دمعي عن ظهورة=لاتقول أنّي سليتك ..ماسليتك
دايم أستر دمع عيني ستر عورة=والاّ أنا ياما تضايقت وبكيتك
أوّله يوم الغلا فأربع شهورة=وآخره في يوم جيت ولا لقيتك
أعتبر مسياري لجارك.. ضرورة=لجل أوقّف موتري قدام بيتك
وأنتظر لي ربع ساعة.. عند سورة=ماخبرت أن دخلته.. ما أحتريتك
وأنت تأخذني على عميا مشورة=مسرفٍ بي لارحم حيّك وميتك
تحسب أنّي ناسيٍ حبك ودورة=لو نسيت أبوي وأمّي مانسيتك
الله اللي حطّ لك في العين صورة=والله أن يمحا نظرها مامحيتك
تلمحك روضٍ يقلدني زهورة=ناعمٍ لو أنّك بتوكل كليتك
موج حبك في الحشا صفقه وفورة=والظنون تسد نفسي لأشتهيتك
وش تعللها عليه من الخطورة=يامعللها على ليتك وليتك
واحدٍ من طاري أسمك طق زورة=وش يقول أن سمع لبيك وفديتك
عذره بمخباة لو يفقد شعورة=وأنت عذرك لارماك الله رميتك
لاتهز الغصن وتطيّر طيورة=أتق الله وأحترم مجدك وصيتك
وأن حداك مساير النفس الغيورة=مرحبا من واحدك لكمبليتك
أرمني فالنار من عميا مشورة=وأسرف أسرف لارحم حيّك وميتك

سلام الله على أوّل من عزف جرحي من الاحباب=سلامٍ فيه من عمق المحيط وعرضه وطوله
على اللي قبل اعرفه ما انفتح للحب عندي باب=جميع ابواب قلبي عن جميع الناس مقفوله
يصير البحر بعد الموج الازرق كومتين تراب=وانا احبه واحبه مثل حب الارض لرجوله
احبه واعشقه واغليه والدنيا جناح ذباب=ما تسوى في عيوني هندبت كابه ومريوله
دموعي وابتهالاتي وحسراتي عليه اسراب=يدور بها زمان الصمت من حوله ليا حوله
وقف بيني وبينه مايسمى قسوة الاقراب=وصار مواصله ياناس لا جيتوه قولوا له

لقينا للتخلف في الوجيه البيض حبة خال=خسارة يالقلم والحبر والدفتر والاستادي
مابه شيٍ تغير لا يزالون العيال عيال=نلبّسهم مقاس "سمول" ولاّ حجم ولادي
الا يالله دخيلك قفّلت روس البشر باقفال=ولا به مدخلٍ يوجد لها من جاي من غادي
لبو الغترة لبو الموتر لبو البيجر لبو الجوال=لبو التعليم والتدريس والتلفاز والرادي
ما فادتكم بشي ولا اثرّت فيكم ولا مثقال=كما كنتم سوالفكم نفاق وشرك والحادي
وهل القرشين وريالين يعني إنّا رجال اعمال=فقارى كلهم ما ياجدون الملح والزادي
كذب من بشّر بمستقبلٍ زاهر صدق من قال=نصبّ العلم فقلوب العرب وتحدّر الوادي
تريّح يا مشجع لك فريقٍ ما يجيب اقوال=هذا ماهو بذنبك ذنب من دخّلهم النادي
لا تدعو للتطور والجهل تسعى به الجهال=ترى الممتاز في علم الجهل يضحك به العادي
هل النمة من القطب الجنوبي لا "قصير بلال"=عليهم من سخط ربي سواة الحبل منقادي
عساهم في ذهاب وفي انقراض وفي تردي حال=وشهّر يالله بغراتهم في روس الاشهادي
اخذهم يا عزيزٍ مقتدر يا عالي المنزال=على نارٍ هواها صلف مجموعات وافرادي
وكبّلهم باكاليلٍ من الفولاذ والاغلال=عراةٍ ما لهم بالمغفرة شفّاع ومنادي
يحز النفس ما شفته من التقصير والاهمال=ولا يعبد وجيه الناس من لله عبادي
وانا شاعر واغيّر في السلوك اللي مهوب اجلال=ويرضى اللي على الدرب الصحيح ويزعل الغادي
اكافح بالعلاج امراض عصر اليوم لا تغتال=شراييني وياقف دمها عن مشّة فوادي
ولا اسلّم زمام الامر للدنيا على ايّة حال=مواطن لازم اسعى بالوفا والخير لبلادي

راكب اللي لو يطوفك ماقدرت تطوفه=سيّد الالوان لا فضي ولافيراني
يوم سواقه على سمعي يعدّ وصوفه=والله ان كنك تدورني ولا تلقاني
اذكر انه قال في عرض الكلام اطروفه=راح منها شي وآخرها بقى فلساني
اتحفوآبه واعذره لجل بعض ضروفه=واتركه عند العمل لا تنظله جيراني
قلت وين القاه لا مني بغيت اشوفه=قال في قصر السلام وفي قصر دسماني
الفخامة تفرق اسمه قبل تفرق نوفه=والفياقرا تجمع اسمه واسم شي ٍ ثاني
فيه من هتلر دهآ عقله وزين وقوفه=تقدر تسمّيه نصراني ولد نصراني
لا انفرش في الارض وارخى لَلتراب كتوفه=قطعة السجاد قدم المتحف الايراني
لوحته بالطول وارقامه سوات حروفه=تازن اعقالك على صدامه الورّاني
وشوشة مراوحه يوم اشتغل وبلوفه=وشوشة عجمي يسولف له على قحطاني
صوت حساسه تقول يسمعك معزوفه=من كلِماتي وادائي وفكرتي والحاني
وقفتة وقفة زعولٍ في يدينه طوفه=يحذف البي ام والفكسار والنيساني
وان مشى كنه على المسرح يعرض بروفه=ودك تخاويه وتعلق عليه العاني
لادلهم الليل قدمه والهبوب تلوفه=اسرع من السيف الاملح في رقبة الجاني
لين ياصل بيت من تلويحته بكفوفه=كنه يلوح بها في منتصف شرياني
من عرفته والغلا تفاحةٍ منصوفه=نصف خذه ونصفه الآخر خذوه خواني
ليتني بالشعر يوم ابرد حشاشة جوفه=يستحى مني ويذكرني ولاينساني
مايخليني لمنّة غيره ومعروفه=لو اجيه اطلب ذنوبه كلها مااعطاني