ماني أول مذنب .. الدنيا تغطيها الذنوب=ولاني آخر سارق بدنيا الظما والمسغبه
إيه أنا سارق شعر ولا نويت إني أتوب=ودي أروي دامني ظامي من الشعر أعذبه
ودي أشري من فقيرٍ فرّ من نفسه هروب=شاعرٍ حظه ردي مايوم حصّل مطلبه
ماقدرت أشريه مثل الناس لجل إني مغلوب=حالي أفقر من فقير ولا معي ماأكسبه
حيلة المضطر لا منه تحدته الكروب=ولا وجد غير ارتكاب الصعب لازم يركبه
من يقول انه ورث شعره من اسلافه كذوب=الشعر ساعة تجلي والمواجع تكتبه
وادري إن البعض ضاقت به فسيحات الدروب=مايبي قول الصراحه والصراحه تتعبه
إيه أقر واعترف من يقترف ذنب وعيوب=يكتبه ذنبه ويظهر لو يحاول يشطبه
استرقته من عيون الغيد والنظره تنوب=عن تفاصيل المشاعر سرها ماتحجبه
من صهيل الخيل والتاريخ يوصف لي الحروب=والبطل ماغادر البتار صهوة منكبه
من تعابير الوجيه اللي يلوّنها الشحوب=واجمه من خوف يتم وجوع ذل ومتربه
من شعور الحزن يوم الشمس مالت للغروب=يوم ودعت بغياب الشمس يومٍ ماأصعبه
من خضار التين والزيتون في أرض الجنوب=من عبير الورد والريحان والزهر أكتبه
لا سجع طيرٍ وغنّى وانتشى الدوح الطروب=وقامت غصونه تمايل شوق مما يطربه
ماتلاقيني هناك ولا هنا قلبي يذوب=يغرق بدنيا الهوى واسقيه عشق وأشربه
وخل هالعالم يقولوا عني أسرف بالذنوب=دامني شاعر وقلبي يحكمه من يسلبه